ਰੋਮ, ਇਟਲੀ (ਸੱਚੀ ਕਲਮ ਬਿਊਰੋ) : ਇਟਲੀ ਪੁਲਿਸ ਨੇ ਇਕ ਅਜਿਹਾ ਹੈਰਾਨੀ ਜਨਕ ਮਾਮਲਾ ਸਾਹਮਣੇ ਲਿਆਂਦਾ ਹੈ ਜਿਸ ਨੂੰ ਸੁਣ ਕੇ ਹਰ ਕੋਈ ਹੈਰਾਨ ਰਹਿ ਜਾਵੇਗਾ। ਇਕ ਧੋਖਾਧੜੀ ਦਾ ਮਾਮਲਾ ਸਾਹਮਣੇ ਆਇਆ ਹੈ ਕਿ ਇਕ ਹਸਪਤਾਲ ਦਾ ਕਰਮਚਾਰੀ ਪਿਛਲੇ 15 ਸਾਲਾਂ ਤੋਂ ਇਕ ਦਿਨ ਵੀ ਕੰਮ ’ਤੇ ਗਏ ਬੇਗੈਰ ਹਰ ਮਹੀਨੇ ਤਨਖ਼ਾਹ ਲੈ ਰਿਹਾ ਹੈ। ਅਜਿਹਾ ਕਰ ਕੇ ਉਸ ਨੇ ਪਿਛਲੇ 15 ਸਾਲਾਂ ਵਿਚ 5 ਲੱਖ 38 ਹਜ਼ਾਰ ਯੂਰੋ ਦੇ ਕਰੀਬ ਸਰਕਾਰੀ ਖ਼ਜ਼ਾਨੇ ਨੂੰ ਚੂਨਾ ਲਾਇਆ ਹੈ । ਪ੍ਰਾਪਤ ਵੇਰਵਿਆ ਅਨੁਸਾਰ ਵਿਅਕਤੀ ਨੇ 2005 ਵਿਚ ਅਪਣੀ ਨੌਕਰੀ ਛੱਡ ਦਿਤੀ ਸੀ ਤੇ ਹੁਣ ਉਸਦੀ ਉਮਰ 66 ਸਾਲ ਦੀ ਹੋ ਚੁੱਕੀ ਹੈ ਤੇ ਉਹ ਪੈਨਸ਼ਨ ਦੇ ਸੁਪਨੇ ਵੀ ਲੈ ਰਿਹਾ ਸੀ ਪਰ ਇਕ ਹੋਰ ਕੇਸ ਦੀ ਛਾਣਬੀਣ ਕਰਦਿਆ ਪੁਲਿਸ ਦੇ ਧਿਆਨ ਵਿਚ ਇਹ ਮਾਮਲਾ ਵੀ ਆ ਗਿਆ ਜਿਥੋ ਉਨਾਂ ਨੂੰ ਪਤਾ ਲੱਗਾ ਕਿ ਸਬੰਧਤ ਵਿਅਕਤੀ ਪਿਛਲੇ 15 ਸਾਲਾਂ ਤੋਂ ਧੋਖਾਧੜੀ ਕਰ ਕੇ ਪੈਸਾ ਵਸੂਲ ਰਿਹਾ ਹੈ। ਛਾਣਬੀਣ ਕਰ ਰਹੀ ਪੁਲਿਸ ਟੀਮ ਵਲੋਂ ਮਾਮਲੇ ਦੀ ਤਹਿ ਤਕ ਜਾਣ ਲਈ ਦਖਣੀ ਇਟਲੀ ਦੇ ਸ਼ਹਿਰ ਕਤਨਜਾਰੋ ਦੇ ਹਸਪਤਾਲ ਨਾਲ ਸਬੰਧਤ ਹੋਰ ਕਰਮਚਾਰੀਆਂ ਤੋਂ ਵੀ ਪੁੱਛ ਪੜਤਾਲ ਕੀਤੀ ਜਾ ਰਹੀ ਹੈ ਅਤੇ ਇਹ ਪਤਾ ਲਾਇਆ ਜਾ ਰਿਹਾ ਹੈ ਕਿ ਇਹ ਵਿਅਕਤੀ ਕਿਸ ਕਿਸ ਨਾਲ ਰਲ ਕੇ ਇਹ ਕਾਰਾ ਕਰ ਰਿਹਾ ਸੀ।