ਸ੍ਰੀਨਗਰ : ਕਸ਼ਮੀਰ 'ਚ ਅੱਤਵਾਦੀਆਂ ਨੇ ਹੋਰਨਾਂ ਰਾਜਾਂ ਦੇ ਲੋਕਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਸਾਜ਼ਿਸ਼ ਨੂੰ ਜਾਰੀ ਰੱਖਦੇ ਹੋਏ ਵੀਰਵਾਰ ਨੂੰ ਪੁਲਵਾਮਾ 'ਚ ਪਠਾਨਕੋਟ ਦੇ ਇਕ ਟਰੱਕ ਡਰਾਈਵਰ ਨੂੰ ਗੋਲੀ ਮਾਰ ਕੇ ਜ਼ਖਮੀ ਕਰ ਦਿੱਤਾ।
ਜਾਣਕਾਰੀ ਅਨੁਸਾਰ ਪੰਜਾਬ ਦੇ ਪਠਾਨਕੋਟ ਤੋਂ ਡਰਾਈਵਰ ਸੋਨੂੰ ਸ਼ਰਮਾ ਸਾਮਾਨ ਨਾਲ ਲੱਦਿਆ ਟਰੱਕ ਲੈ ਕੇ ਕਸ਼ਮੀਰ ਆਇਆ ਸੀ। ਪੁਲਵਾਮਾ ਦੇ ਲੱਸੀਪੋਰਾ ਨੇੜੇ ਉਹ ਟਰੱਕ 'ਚੋਂ ਉੱਤਰ ਕੇ ਕੁਝ ਸਾਮਾਨ ਲੈਣ ਲਈ ਇਕ ਦੁਕਾਨ ਵੱਲ ਜਾ ਰਿਹਾ ਸੀ ਕਿ ਅਚਾਨਕ ਉਥੇ ਅੱਤਵਾਦੀ ਆ ਗਏ।
ਅੱਤਵਾਦੀਆਂ ਨੇ ਡਰਾਈਵਰ ਦੀ ਲੱਤ 'ਤੇ ਗੋਲੀਆਂ ਮਾਰੀਆਂ। ਗੋਲੀਆਂ ਦੀ ਆਵਾਜ਼ ਸੁਣ ਕੇ ਬਾਜ਼ਾਰ ਵਿਚ ਤਰਥੱਲੀ ਮਚ ਗਈ ਅਤੇ ਅੱਤਵਾਦੀ ਭੱਜ ਗਏ। ਇਸੇ ਦੌਰਾਨ ਨੇੜਲੇ ਇਲਾਕੇ ਵਿਚ ਗਸ਼ਤ ਕਰ ਰਹੇ ਪੁਲਿਸ ਅਤੇ ਸੀਆਰਪੀਐÎਫ ਦੇ ਜਵਾਨ ਉਥੇ ਮੌਕੇ 'ਤੇ ਪਹੁੰਚ ਗਏ।
ਉਨ੍ਹਾਂ ਸਥਾਨਕ ਲੋਕਾਂ ਦੀ ਮਦਦ ਨਾਲ ਜ਼ਖਮੀ ਡਰਾਈਵਰ ਨੂੰ ਹਸਪਤਾਲ ਪਹੁੰਚਾਇਆ। ਸੁਰੱਖਿਆ ਬਲਾਂ ਨੇ ਅੱਤਵਾਦੀਆਂ ਦੀ ਭਾਲ ਤੇਜ਼ ਕਰ ਦਿੱਤੀ ਹੈ।
ਪਿਛਲੇ ਪੰਜ ਦਿਨਾਂ ਵਿਚ ਅੱਤਵਾਦੀ ਘਾਟੀ ਵਿਚ ਦੂਸਰੇ ਰਾਜਾਂ ਦੇ ਚਾਰ ਲੋਕਾਂ ਤੇ ਇਕ ਕਸ਼ਮੀਰੀ ਹਿੰਦੂ ਨੂੰ ਨਿਸ਼ਾਨਾ ਬਣਾ ਚੁੱਕੇ ਹਨ।