ਕੈਲੀਫੋਰਨੀਆ : ਕਦੇ ਕਦੇ ਆਸਮਾਨ ਤੋਂ ਮੌਤ ਇਵੇ ਡਿੱਗਦੀ ਹੈ ਕਿ ਬਚਣਾ ਔਖਾ ਹੋ ਜਾਂਦਾ ਹੈ। ਇਵੇਂ ਹੀ ਹੋਇਆ ਮਿਸੀਸਿਪੀ ’ਚ ਜਿੱਥੇ ਇੱਕ ਛੋਟਾ ਜਹਾਜ਼ ਕ੍ਰੈਸ਼ ਹੋਣ ਤੋਂ ਬਾਅਦ ਇੱਕ ਘਰ ਉੱਤੇ ਡਿੱਗ ਗਿਆ, ਜਿਸ ਨਾਲ ਘਰ ਦੇ 4 ਲੋਕਾਂ ’ਚੋਂ 1 ਅਤੇ ਜਹਾਜ਼ ’ਚ ਸਵਾਰ ਟੈਕਸਾਸ ਦੇ ਤਿੰਨ ਨਿਵਾਸੀਆਂ ਦੀ ਮੌਤ ਹੋ ਗਈ, ਜੋ ਇੱਕ ਯੂਨੀਵਰਸਿਟੀ ਗ੍ਰੈਜੂਏਸ਼ਨ ਸਮਾਰੋਹ ਲਈ ਜਾ ਰਹੇ ਸਨ। ਇਸ ਹਾਦਸੇ ’ਚ ਮਰਨ ਵਾਲਾ 55 ਸਾਲਾ ਗੈਰੀ ਸਟੈਂਡਲੀ ਉਸ ਘਰ ਦਾ ਵਸਨੀਕ ਸੀ, ਜਿਥੇ ਹੈਟਿਸਬਰਗ, ਮਿਸੀਸਿਪੀ ’ਚ ਜਹਾਜ਼ ਹਾਦਸਾਗ੍ਰਸਤ ਹੋਇਆ। ਇਸ ਤੋਂ ਇਲਾਵਾ 67 ਸਾਲਾ ਲੂਈਸ ਪ੍ਰੋਵੈਂਜ਼ਾ, 23 ਸਾਲਾ ਅੰਨਾ ਕੈਲਹੋਨ ਅਤੇ 2 ਸਾਲਾ ਹਾਰਪਰ ਪ੍ਰੋਵੈਂਜ਼ਾ ਵੀ ਇਸ ਹਾਦਸੇ ’ਚ ਮਾਰੇ ਗਏ। ਹੈਟਿਸਬਰਗ ਜੈਕਸਨ, ਮਿਸੀਸਿਪੀ ਤੋਂ 90 ਮੀਲ ਦੱਖਣ-ਪੂਰਬ ਵੱਲ ਸਥਿਤ ਹੈ। ਯੂਨੀਵਰਸਿਟੀ ਆਫ ਸਾਊਦਰਨ ਮਿਸੀਸਿਪੀ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਜਹਾਜ਼ ’ਚ ਸਵਾਰ ਤਿੰਨ ਵਿਅਕਤੀ ਇੱਕ ਸਮਾਰੋਹ ’ਚ ਸ਼ਾਮਿਲ ਹੋਣ ਲਈ ਹੈਟਿਸਬਰਗ ਆ ਰਹੇ ਸਨ।