ਸ਼ਿਮਲਾ : ਸ਼ਿਮਲਾ ਦੇ ਇਤਿਹਾਸਕ ਗ੍ਰੈਂਡ ਹੋਟਲ 'ਚ ਅੱਗ ਲੱਗ ਕਾਰਨ ਲੱਖਾਂ ਦਾ ਨੁਕਸਾਨ ਹੋਣ ਦੀ ਖਬਰ ਹੈ। ਇਹ ਘਟਨਾ ਐਤਵਾਰ ਰਾਤ ਦੀ ਦੱਸੀ ਜਾ ਰਹੀ ਹੈ। ਹਾਲਾਂਕਿ ਇਸ 'ਚ ਕਿਸੇ ਵੀ ਜਾਨੀ ਨੁਕਸਾਨ ਦੀ ਖਬਰ ਨਹੀਂ ਹੈ। ਹੋਟਲ ਨੂੰ ਕਾਫੀ ਨੁਕਸਾਨ ਪੁੱਜਾ ਹੈ ਤੇ ਇਸ ਦਾ ਕਾਫੀ ਹਿੱਸਾ ਅੱਗ ਦੀਆਂ ਲਪਟਾਂ ਕਾਰਨ ਝੁਲਸ ਚੁੱਕਾ ਹੈ। ਇਸ 'ਤੇ ਕਾਬੂ ਪਾਉਣ ਲਈ ਤਕਰੀਬਨ 2 ਘੰਟੇ ਲੱਗੇ ਤੇ ਸੋਮਵਾਰ ਤੜਕੇ 3 ਵਜੇ ਤਕ ਕਾਬੂ ਪਾਇਆ ਜਾ ਸਕਿਆ। ਜਾਣਕਾਰੀ ਮੁਤਾਬਕ, ਐਤਵਾਰ ਰਾਤ 12.50 ਵਜੇ ਹੋਟਲ 'ਚ ਅੱਗ ਲੱਗੀ। ਸਥਾਨਕ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਲੋਕਾਂ ਦੀ ਖਾਸ ਪਸੰਦ ਵਾਲਾ ਹੋਟਲ ਹੈ ਅਤੇ ਛੁੱਟੀਆਂ 'ਚ ਇਹ ਪੂਰਾ ਭਰਿਆ ਹੁੰਦਾ ਹੈ ਪਰ ਇਸ ਸਮੇਂ ਇੱਥੇ ਮੁਰੰਮਤ ਦਾ ਕੰਮ ਚੱਲ ਰਿਹਾ ਸੀ। ਇਸ ਲਈ ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ ਹੋ ਗਿਆ। ਪੁਲਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਹੋਟਲ ਦਾ ਤਾਲਾ ਤੋੜ ਕੇ ਅੰਦਰ ਜਾਣਾ ਪਿਆ ਕਿਉਂਕਿ ਉਸ ਸਮੇਂ ਹੋਟਲ ਦਾ ਕੋਈ ਵੀ ਅਧਿਕਾਰੀ ਨਹੀਂ ਸੀ। ਹੋਟਲ 'ਚ ਪਾਣੀ ਦਾ ਵੱਡਾ ਟੈਂਕ ਹੋਣ ਕਾਰਨ ਜਲਦੀ ਅੱਗ ਬੁਝਾਈ ਜਾ ਸਕੀ। ਅਜੇ ਤਕ ਅੱਗ ਲੱਗਣ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ।