ਖੇਤੀ ਕਾਨੂੰਨ : ਦਿੱਲੀ ਵੱਲ ਧੂੜਾਂ ਪੁੱਟਣਗੀਆਂ ਸੰਘਰਸ਼ੀ ਧਿਰਾਂ ਦੀਆਂ ਬੱਸਾਂ

ਕਿਸਾਨਾਂ ਵੱਲੋਂ 26-27 ਨਵੰਬਰ ਲਈ ਤਿਆਰੀਆਂ ਜੋਰਾਂ ਤੇ

ਬਠਿੰਡਾ : ਪ੍ਰਿੰਸੀਪਲ ਸੁਰਜੀਤ ਸਿੰਘ ਨੇ ਕਿਸਾਨੀ ਸੰਘਰਸ਼ ਲਈ ਸਕੂਲ ਬੱਸ ਦੀ ਭੇਟਾ ਪਾਈ ਹੈ। ਹੁਣ ਜਦੋਂ ਮੋਦੀ ਸਰਕਾਰ ਨਾਲ ਸਿਰ ਧੜ ਦੀ ਲੱਗੀ ਹੈ ਤਾਂ ਉਹਨਾਂ ਗੱਜ ਵੱਜਕੇ ਕਾਲਜ ਬੱਸ ਕਿਸਾਨਾਂ ਹਵਾਲੇ ਕਰ ਦਿੱਤੀ ਜੋ ਹੁਣ 26- 27 ਨਵੰਬਰ ਨੂੰ ਦਿੱਲੀ ਵੱਲ ਕੂਚ ਕਰੇਗੀ। ਬਾਬਾ ਕੁੰਦਨ ਸਿੰਘ ਮੰਦਰ ਮੁਹਾਰ ਕਾਲਜ ਦੇ ਚੇਅਰਮੈਨ ਪ੍ਰਿੰਸੀਪਲ ਸੁਰਜੀਤ ਸਿੰਘ ਸਿੱਧੂ ਜੋ ਕਿਸਾਨ ਵੀ ਹਨ ਨੇ ਇਹ ਪਹਿਲਕਦਮੀ ਕੀਤੀ ਹੈ। ਉਹਨਾਂ ਸੰਘਰਸ਼ੀ ਕਿਸਾਨ ਆਗੂਆਂ ਨੂੰ ਦਿੱਲੀ ਜਾਣ ਲਈ ਹੋਰ ਵੀ ਬੱਸਾਂ ਮੁਹੱਈਆ ਕਰਵਾਉਣ ਲਈ ਆਖਿਆ ਹੈ। ਇਸੇ ਤਰਾਂ ਹੀ ਹੇਮਕੁੰਡ ਸਕੂਲ ਦੇ ਚੇਅਰਮੈਨ ਕੁਲਵੰਤ ਸਿੰਘ ਸੰਧੂ ਨੇ ਵੀ ਦਿੱਲੀ ਜਾਣ ਲਈ ਉਹਨਾਂ ਦੇ ਸਕੂਲ ਦੀਆਂ ਬੱਸਾਂ ਭੇਜਣ ਲਈ ਆਖ ਦਿੱਤਾ ਹੈ। ਭਾਰਤੀ ਕਿਸਾਨ ਯੂਨੀਅਨ ਪੰਜਾਬ ਦੇ ਜਰਨਲ ਸਕੱਤਰ ਬਲਵੰਤ ਸਿੰਘ ਬਹਿਰਾਮ ਕੇ ਦਾ ਕਹਿਣਾ ਸੀ ਕਿ ਬੱਸ ਨੂੰ ਸੰਘਰਸ਼ੀ ਰੰਗ 'ਚ ਰੰਗਦਿਆਂ ਇਸ ਦਾ ਨਾਮ 'ਪੇਂਡੂ ਕਿਸਾਨ ਜਾਗਰੂਕਤਾ ਬੱਸ' ਰੱਖਿਆ ਹੈ। ਬੱਸ ਦੇ ਅੱਗਲੇ ਹਿੱਸੇ ਤੇ ਮੋਦੀ ਸਰਕਾਰ ਖਿਲਾਫ ਨਾਅਰਾ ਲਿਖਿਆ ਹੈ ਤਾਂ ਪਿਛਲੇ ਪਾਸੇ 'ਅਜੇ ਟਰੇਲਰ ਚੱਲਦਾ 26-27 ਨਵੰਬਰ ਨੂੰ ਫਿਲਮ ਦਿਖਾਵਾਂਗੇ' ਲਿਖਕੇ ਦਿੱਲੀ ਜਾਣ ਦਾ ਸੱਦਾ ਦਿੱਤਾ ਹੈ। ਇਸ ਵੇਲੇ ਬੱਸ ਪਿੰਡਾਂ 'ਚ ਦਿੱਲੀ ਜਾਣ ਲਈ ਲਾਮਬੰਦੀ ਮੁਹਿੰਮ ਚਲਾ ਰਹੀ ਹੈ। ਇਸੇ ਤਰਾਂ ਹੀ ਪ੍ਰਾਈਵੇਟ ਟਰਾਂਸਪੋਰਟ ਐਸੋਸੀਏਸ਼ਨ ਵੱਲੋਂ ਕਿਸਾਨ ਧਿਰਾਂ ਨੂੰ 11 ਹਜਾਰ ਰੁਪਏ ਦੀ ਮਾਲੀ ਸਹਾਇਤਾ ਦਿੱਤੀ ਹੈ।

ਇਹ ਵੀ ਪੜ੍ਹੋ : ਹਰਿਆਣਾ ਦੇ ਮੁੱਖ ਸਕੱਤਰ ਨੇ ਕੀਤੀ ਕੋਰੋਨਾ ਮਾਮਲਿਆਂ ਦੀ ਸਮੀਖਿਆ

ਬੱਸ ਮਾਲਕ ਭਾਰਤੀ ਕਿਸਾਨ ਯੂਨੀਅਨ ਉਗਰਾਹਾਂ ਵੱਲੋਂ ਲਹਿਰਾ ਬੇਗਾ ਟੋਲ ਪਲਾਜੇ ਤੇ ਚੱਲ ਰਹੇ ਧਰਨੇ 'ਚ ਸ਼ਾਮਲ ਹੋਏ ਸਨ। ਟਰਾਂਸਪੋਰਟਰਾਂ ਨੇ ਦਿੱਲੀ ਜਾਣ ਲਈ ਲੋੜ ਅਨੁਸਾਰ ਬੱਸਾਂ ਮੁਹੱਈਆ ਕਰਵਾਉਣ ਦਾ ਐਲਾਨ ਕੀਤਾ ਹੈ। ਕਿਸਾਨ ਆਗੂ ਜਗਸੀਰ ਸਿੰਘ ਝੁੰਬਾ ਦਾ ਕਹਿਣਾ ਸੀ ਕਿ ਭਾਵੇਂ ਮਾਲੀ ਤੌਰ ਤੇ ਕਿਸਾਨੀ ਘੋਲ ਕਾਫੀ ਮਹਿੰਗੇ ਪੈਣ ਲੱਗੇ ਹਨ ਪਰ ਪੰਜਾਬੀਆਂ ਨੇ ਕਿਸਾਨ ਜੱਥੇਬੰਦੀਆਂ ਨੂੰ ਫੰਡ ਦੇਣ ਵਿੱਚ ਹੱਥ ਖੋਹਲ ਰੱਖਿਆ ਹੈ। ਇਹ ਵਰਤਾਰਾ ਸਿਰਫ ਮਾਲਵੇ ਤੱਕ ਸੀਮਤ ਨਹੀਂ ਬਲਕਿ ਮਾਝੇ ਦੁਆਬੇ ਤੱਕ ਵੀ ਕਿਸਾਨ ਸੰਘਰਸ਼ ਨੂੰ ਵੱਡੀ ਹਮਾਇਤ ਮਿਲੀ ਹੈ। ਜਾਣਕਾਰੀ ਅਨੁਸਾਰ ਕਿਸਾਨ ਅੰਦੋਲਨ ਲਈ ਜਿੱਥੇ ਗੁਪਤ ਦਾਨ ਦੇਣ ਵਾਲੇ ਪੁਲੀਸ ਮੁਲਾਜ਼ਮ ਹਨ ਤਾਂ ਕਈ ਸਾਹਮਣੇ ਆਕੇ ਦੇ ਕੇ ਗਏ ਹਨ। ਇੱਕ ਪੁਲਿਸ ਅਧਿਕਾਰੀ ਨੇ ਵੀ ਗੁਪਤ ਰੂਪ 'ਚ ਸੰਘਰਸ਼ੀ ਚੰਦਾ ਭੇਜਿਆ ਹੈ ਤਾਂ ਕੁੱਝ ਸਿਪਾਹੀ ਲੜਕੀਆਂ ਵੀ ਯੋਗਦਾਨ ਪਾਕੇ ਗਈਆਂ ਹਨ। ਦੂਸਰੇ ਸੂਬਿਆਂ ਦੇ ਟਰੱਕ ਚਾਲਕ ਵੀ ਰਾਤ ਨੂੰ ਗੱਡੀ ਰੋਕ ਦੇ 50 ਰੁਪਏ ਤੋਂ 200 ਰੁਪਏ ਤੱਕ ਦੇ ਜਾਂਦੇ ਹਨ। ਕੌਮੀ ਸੜਕ ਮਾਰਗਾਂ ਤੇ ਚੱਲ ਰਹੇ ਧਰਨਿਆਂ ਨੂੰ ਰਾਹਗੀਰਾਂ ਵੱਲੋਂ ਵੀ ਤਿੱਲ ਫੁੱਲ ਭੇਂਟ ਕੀਤਾ ਜਾ ਰਿਹਾ ਹੈ। ਬੇਸ਼ੱਕ ਇਹ ਫੰਡ ਬਹੁਤਾ ਨਹੀਂ ਹੁੰਦਾ ਹੈ ਪਰ ਥਾਪੜੇ ਦੀ ਕੋਈ ਕਮੀ ਨਹੀਂ ਹੁੰਦੀ ਹੈ। ਮਹੱਤਵਪੂਰਨ ਤੱਥ ਹੈ ਕਿ ਪਿੰਡਾਂ ਚੋਂ ਮੋਰਚਿਆਂ 'ਚ ਰੋਜਾਨਾਂ ਦੁੱਧ ਅਤੇ ਲੰਗਰ ਆ ਰਿਹਾ ਹੈ। ਧਰਨਾਕਾਰੀਆਂ ਲਈ ਕਦੇ ਚਾਵਲਾਂ ਦੇ ਕੜਾਹੇ ਭੇਜੇ ਜਾ ਰਹੇ ਹਨ ਅਤੇ ਕਦੇ ਬਦਾਣਾ ਵੰਡਿਆ ਜਾ ਰਿਹਾ ਹੈ ਜਦੋਂਕਿ ਕੇਲਿਆਂ ਸਮੇਤ ਹੋਰ ਖਾਣ ਪੀਣ ਵਾਲੀਆਂ ਵਸਤਾਂ ਇਸ ਤੋਂ ਅਲੱਗ ਹਨ। ਮੋਦੀ ਸਰਕਾਰ ਦੇ ਵਤੀਰੇ ਨੂੰ ਦੇਖਦਿਆਂ ਅਧਿਆਪਕ ਧਿਰਾਂ ਵੀ ਕਿਸਾਨਾਂ ਦੀ ਪਿੱਠ ਤੇ ਆ ਗਈਆਂ ਹਨ। ਡੀਟੀਐਫ ਪੰਜਾਬ ਵੀ ਸਹਾਇਤਾ ਰਾਸ਼ੀ ਵਜੋਂ ਵੱਡਾ ਚੈਕ ਸੌਂਪ ਕੇ ਗਈ ਸੀ । 

ਇਹ ਵੀ ਪੜ੍ਹੋ : Bihar Election Results: ਬਿਹਾਰ 'ਚ NDA ਨੇ ਲਹਿਰਾਇਆ ਜਿੱਤ ਦਾ ਝੰਡਾ