ਨਵੀਂ ਦਿੱਲੀ : ਦਿੱਲੀ ਫ਼ਾਇਰ ਸਰਵਿਸ ਨੇ ਸਨਿਚਰਵਾਰ ਸਵੇਰੇ ਤੇਜ਼ ਮੀਂਹ ਮਗਰੋਂ ਪਾਣੀ ਭਰਨ ਕਾਰਨ ਅੰਡਰਪਾਸ ’ਚ ਫਸੀ ਇਕ ਨਿਜੀ ਬੱਸ ’ਚ ਸਵਾਰ 40 ਯਾਤਰੀਆਂ ਨੂੰ ਬਚਾਇਆ। ਅਧਿਕਾਰੀਆਂ ਨੇ ਦਸਿਆ ਕਿ ਬੱਸ ਮਥੁਰਾ ਜਾ ਰਹੀ ਸੀ ਪਰ ਪਾਲਮ ਫ਼ਲਾਈਓਵਰ ਦੇ ਅੰਡਰਪਾਸ ’ਚ ਫਸ ਗਈ। ਬੱਸ ’ਚ ਸਵਾਰ ਸਵਾਰੀਆਂ ’ਚ ਔਰਤਾਂ ਅਤੇ ਬੱਚੇ ਵੀ ਸਨ। ਉਨ੍ਹਾਂ ਦਸਿਆ ਕਿ ਫ਼ਾਇਰ ਸਰਵਿਸ ਨੂੰ ਸਵੇਰੇ ਕਰੀਬ ਸਾਢੇ 11 ਵਜੇ ਮਦਦ ਲਈ ਕਾਲ ਆਈ, ਜਿਸ ਤੋਂ ਬਾਅਦ ਫ਼ਾਇਰ ਬਿ੍ਰਗੇਡ ਦੀਆਂ ਦੋ ਗੱਡੀਆਂ ਨੂੰ ਮੌਕੇ ’ਤੇ ਭੇਜਿਆ ਗਿਆ। ਦਿੱਲੀ ਫ਼ਾਇਰ ਸਰਵਿਸ ਦੇ ਡਾਇਰੈਕਟਰ ਅਤੁਲ ਗਰਗ ਨੇ ਦਸਿਆ ਕਿ ਸਾਰੀਆਂ ਸਵਾਰੀਆਂ ਨੂੰ ਬਚਾਅ ਲਿਆ ਗਿਆ ਅਤੇ ਉਹ ਸੁਰੱਖਿਅਤ ਹਨ।