ਤੰਜਾਪੁਰ, (ਏਜੰਸੀ): ਵਫ਼ਾਦਾਰੀ ਦਾ ਬਿਹਤਰੀਨ ਨਮੂਨਾ ਪੇਸ਼ ਕਰਦਿਆਂ ਪਾਲਤੂ ਕੁੱਤੇ ਨੇ ਅਪਣੇ ਮਾਲਕ ਨੂੰ ਕੋਬਰਾ ਸੱਪ ਤੋਂ ਬਚਾਇਆ। ਕੁੱਤੇ ਨੇ ਜ਼ਹਿਰੀਲੇ ਸੱਪ ਨੂੰ ਮਾਰ ਦਿਤਾ ਅਤੇ ਇਸ ਕਵਾਇਦ ਵਿਚ ਅਪਣੀ ਜਾਨ ਗਵਾ ਬੈਠਾ।
ਵੇਨਗਰਾਇਨਕੂ ਡਿਕਾਡੂ ਪਿੰਡ ਦੇ ਕਿਸਾਨ 50 ਸਾਲਾ ਨਟਰਾਜਨ 'ਤੇ ਕਰੀਬ ਪੰਜ ਫ਼ੁਟ ਲੰਮੇ ਕੋਬਰਾ ਨੇ ਹਮਲਾ ਕਰ ਦਿਤਾ ਜਿਸ ਨੂੰ ਵੇਖਦਿਆਂ ਕੁੱਤਾ 'ਪੱਪੀ' ਉਸ ਨੂੰ ਬਚਾਉਣ ਲਈ ਸੱਪ 'ਤੇ ਕੁੱਦ ਪਿਆ। ਘਟਨਾ ਸਮੇਂ ਕਿਸਾਨ ਅਪਣੇ ਖੇਤ ਵਲ ਜਾ ਰਿਹਾ ਸੀ। ਕੁੱਤੇ ਅਤੇ ਸੱਪ ਦੀ ਲੜਾਈ ਵੇਖ ਕੇ ਸੱਪ ਨੂੰ ਖਦੇੜਨ ਲਾਠੀ ਲਿਆਉਣ ਵਾਸਤੇ ਕਿਸਾਨ ਲਾਗੇ ਹੀ ਪੈਂਦੇ ਅਪਣੇ ਘਰ ਚਲਾ ਗਿਆ। ਕਿਸਾਨ ਨੇ ਦਸਿਆ ਕਿ ਜਦ ਤਕ ਉਹ ਮੁੜਦਾ, ਕੁੱਤੇ ਨੇ ਸੱਪ ਨੂੰ ਮਾਰ ਦਿਤਾ ਸੀ ਹਾਲਾਂਕਿ ਸੱਪ ਦੇ ਡੰਗੇ ਜਾਣ ਕਾਰਨ ਜ਼ਹਿਰ ਫੈਲਣ ਕਰ ਕੇ ਕੁੱਤੇ ਦੀ ਮੌਤ ਹੋ ਗਈ। ਕੋਬਰਾ ਸੱਪ ਨਾਲ ਕੁੱਤੇ ਦੀ ਲੜਾਈ ਦੀ ਖ਼ਬਰ ਫੈਲ ਗਈ ਅਤੇ ਉਸ ਨੂੰ ਸ਼ਰਧਾਂਜਲੀ ਦੇਣ ਲਈ ਲੋਕ ਕਿਸਾਨ ਦੇ ਘਰ ਪਹੁੰਚੇ।