ਮੁਰਦਾਬਾਦ : ਉੱਤਰ ਪ੍ਰਦੇਸ਼ ਦੇ ਮੁਰਦਾਬਾਦ 'ਚ ਇਕੋ ਪਰਵਾਰ ਦੇ 2 ਮਾਸੂਮ ਭਰਾਵਾਂ ਦੀ ਕਾਰ 'ਚ ਖੇਡਦੇ ਸਮੇਂ ਦਮ ਘੁੱਟਣ ਨਾਲ ਮੌਤ ਹੋ ਗਈ ਅਤੇ 2 ਹੋਰ ਬੀਮਾਰ ਹੋ ਗਏ। ਪੁਲਿਸ ਸੂਤਰਾਂ ਨੇ ਦਸਿਆ ਕਿ ਮੂੰਢਾਪਾਂਡੇ ਖੇਤਰ ਵੀਰਪੁਰ ਪਿੰਡ ਵਾਸੀ ਬੱਬਨ ਦੀ ਕਾਰ ਘਰ ਦੇ ਬਾਹਰ ਖੜ੍ਹੀ ਸੀ।
ਦੋ ਨੇ ਤੋੜਿਆ ਦਮ ਤੇ ਦੋ ਦੀ ਹਾਲਤ ਗੰਭੀਰ |
ਸਵੇਰੇ ਬੱਬਨ ਦੇ ਭਰਾ ਅਤੇ ਭੈਣ ਦੇ ਬੱਚੇ ਖੇਡਦੇ-ਖੇਡਦੇ ਕਾਰ ਤਕ ਜਾ ਪਹੁੰਚੇ। ਖੇਡਦੇ ਸਮੇਂ ਕਾਰ ਦਾ ਦਰਵਾਜ਼ਾ ਕਿਸੇ ਤਰ੍ਹਾਂ ਅੰਦਰੋਂ ਬੰਦ ਹੋ ਗਿਆ। ਕਾਰ 'ਚ ਆਕਸੀਜਨ ਖ਼ਤਮ ਹੋਣ ਤਕ ਮਾਸੂਮ ਖੇਡਣ 'ਚ ਰੁਝੇ ਰਹੇ। ਕੁੱਝ ਸਮੇਂ ਬਾਅਦ ਕਾਰ ਦੇ ਅੰਦਰੋਂ ਆਕਸੀਜਨ ਖ਼ਤਮ ਹੁੰਦੇ ਹੀ ਚਾਰੇ ਮਾਸੂਮ ਬੇਹੋਸ਼ ਹੋ ਗਏ। ਇਸ 'ਚ ਬੱਬਨ ਦਾ ਭਰਾ ਨਾਸਿਰ ਦਾ 5 ਸਾਲਾ ਬੇਟਾ ਅਲਤਾਫ਼ ਅਤੇ 4 ਸਾਲਾ ਸਾਦ ਦੋਹਾਂ ਭਰਾਵਾਂ ਨੇ ਕਾਰ 'ਚ ਹੀ ਦਮ ਤੋੜ ਦਿਤਾ। ਉਨ੍ਹਾਂ ਦਸਿਆ ਕਿ ਬੱਬਨ ਦੀ ਭੈਣ ਦੇ ਦੋਵੇਂ ਬੱਚੇ ਕਾਰ 'ਚ ਹੀ ਤੜਫ਼ਦੇ ਰਹੇ। ਕੁੱਝ ਦੇਰ ਬਾਅਦ ਪਰਵਾਰ ਵਾਲਿਆਂ ਨੇ ਬੱਚਿਆਂ ਦੀ ਭਾਲ ਸ਼ੁਰੂ ਕੀਤੀ। ਬੱਚੇ ਕਾਰ 'ਚ ਬੇਹੋਸ਼ ਪਏ ਮਿਲੇ। ਜਲਦੀ 'ਚ ਕਾਰ ਖੋਲ੍ਹ ਕੇ ਬੱਚਿਆਂ ਨੂੰ ਬਾਹਰ ਕਢਿਆ ਪਰ ਉਦੋਂ ਤਕ ਦੋ ਮਾਸੂਮਾਂ ਦੀ ਮੌਤ ਹੋ ਚੁਕੀ ਸੀ ਤੇ ਦੋ ਬੱਚੇ ਬੇਹੋਸ਼ ਪਏ ਸਨ। ਬੇਹੋਸ਼ੀ ਦੀ ਹਾਲਤ 'ਚ ਮਿਲੇ 2 ਬੱਚਿਆਂ ਨੂੰ ਗੰਭੀਰ ਹਾਲਤ 'ਚ ਜ਼ਿਲ੍ਹਾ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ।