ਜਲੰਧਰ : ਸਥਾਨਕ ਕੌਮੀ ਸ਼ਾਹਮਾਰਗ ’ਤੇ ਅੱਜ ਵਾਪਰੇ ਇਕ ਦਰਦਨਾਕ ਹਾਦਸੇ ਵਿੱਚ 3 ਵਿਅਕਤੀਆਂ ਦੀ ਮੌਤ ਹੋ ਗਈ ਜਦਕਿ 9 ਹੋਰ ਵਿਅਕਤੀ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ 2 ਦੀ ਹਾਲਤ ਗੰਭੀਰ ਦੱਸੀ ਜਾਂਦੀ ਹੈ। ਜਾਣਕਾਰੀ ਅਨੁਸਾਰ ਇਸ ਘਟਨਾ ਵਿੱਚ ਸ੍ਰੀ ਆਨੰਦਪੁਰ ਸਾਹਿਬ ਤੋਂ ਆ ਰਹੀ ਅਤੇ ਬਾਬਾ ਬਕਾਲਾ ਜਾ ਰਹੀ ਇਕ ਸਕੌਰਪੀਓ ਦਾ ਮਗਰਲਾ ਟਾਇਰ ਜਲੰਧਰ ਕਰਤਾਰਪੁਰ ਰੋਡ ’ਤੇ ਬਿਧੀਪੁਰ ਫ਼ਾਟਕ ਨੇੜੇ ਫ਼ਟ ਜਾਣ ਕਾਰਨ ਇਹ ਗੱਡੀ ਪਲਟੀ ਖ਼ਾ ਗਈ। ਹਾਲਾਂਕਿ ਮਗਰੋਂ ਆ ਰਹੀਆਂ ਗੱਡੀਆਂ ਦੀ ਇਸ ਗੱਡੀ ਨਾਲ ਟੱਕਰ ਹੋਣ ਤੋਂ ਬਚਾਅ ਰਿਹਾ ਪਰ ਇਸ ਹਾਦਸੇ ਦੇ ਕਾਰਨ 2 ਔਰਤਾਂ ਸਣੇ 3 ਵਿਅਕਤੀ ਮੌਕੇ ’ਤੇ ਹੀ ਦਮ ਤੋੜ ਗਏ।ਜ਼ਖ਼ਮੀਆਂ ਵਿੱਚ ਇਕ ਛੋਟਾ ਬੱਚਾ ਵੀ ਦੱਸਿਆ ਜਾ ਰਿਹਾ ਹੈ ਜਿਨ੍ਹਾਂ ਨੂੰ ਮਕਸੂਦਾਂ ਸਥਿਤ ਸੇਕਰਡ ਹਾਰਟ ਹਸਪਤਾਲ ਵਿਖੇ ਦਾਖ਼ਲ ਕਰਵਾਇਆ ਗਿਆ ਹੈ। ਥਾਣਾ ਮਕਸੂਦਾਂ ਦੀ ਪੁਲਿਸ ਨੇ ਮੌਕੇ ’ਤੇ ਪਹੁੰਚ ਕੇ ਮਾਮਲੇ ਦੀ ਜਾਂਚ ਉਪਰੰਤ ਅਗਲੇਰੀ ਕਾਰਵਾਈ ਕਰ ਰਹੀ ਹੈ।