ਅਣਪਛਾਤੇ ਚੋਰਾਂ ਨੇ ਮੋਬਾਈਲ ਫ਼ੋਨਾਂ ਦੀ ਦੁਕਾਨ ਨੂੰ ਬਣਾਇਆ ਨਿਸ਼ਾਨਾ

ਬੰਗਾ/ਨਵਾਂ ਸ਼ਹਿਰ : ਪੁਲਿਸ ਥਾਣਾ ਸਦਰ ਬੰਗਾ ਵਿਖੇ ਮੋਬਾਇਲ ਫੋਨਾਂ ਦੀ ਇਕ ਦੁਕਾਨ ’ਤੇ ਹੋਈ ਚੋਰੀ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਚੋਰੀ ਸਬੰਧੀ ਪੁਲਿਸ ਨੂੰ ਦਿੱਤੇ ਬਿਆਨ ਵਿਚ ਪਮਨਪ੍ਰੀਤ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਵਾਸੀ ਪਿੰਡ ਭੀਣ ਥਾਣਾ ਸਦਰ ਨਵਾਂਸ਼ਹਿਰ ਨੇ ਦੱਸਿਆ ਕਿ ਉਹ ਬੰਗਾ - ਗੜ੍ਹਸ਼ੰਕਰ ਰੋਡ ’ਤੇ ਪੈਂਦੇ  ਪਿੰਡ ਪੱਲੀ ਝਿੱਕੀ ਦੇ ਬੱਸ ਅੱਡੇ ’ਤੇ ਮੋਬਾਇਲ ਫੋਨ ਰਿਪੇਅਰ ਕਰਨ ਦੀ ਦੁਕਾਨ ਕਰਦਾ ਹੈ। ਬੀਤੀ 21 ਜੁਲਾਈ ਨੂੰ ਸ਼ਾਮ 8 ਵਜੇ ਉਹ ਰੋਜ਼ਾਨਾ ਦੀ ਤਰ੍ਹਾਂ ਦੁਕਾਨ ਬੰਦ ਕਰ ਕੇ ਆਪਣੇ ਘਰ ਨੂੰ ਚਲਾ ਗਿਆ ਸੀ। ਅਗਲੇ ਦਿਨ 22 ਜੁਲਾਈ ਨੂੰ ਸਵੇਰੇ 04:30 ਕੁ ਵਜੇ ਉਸ ਨੂੰ ਦੁਕਾਨ ਦੇ ਮਾਲਕ ਬਲਵੀਰ ਸਿੰਘ ਦੇ ਪੋਤੇ ਗਗਨਦੀਪ ਸਿੰਘ ਨੇ ਦੱਸਿਆ ਕਿ ਉਸ ਦੀ ਦੁਕਾਨ ਦਾ ਸ਼ਟਰ  ਥੋੜ੍ਹਾ ਉਪਰ ਚੁੱਕਿਆ ਹੋਇਆ ਹੈ। ਜਦੋਂ ਬਿਆਨ ਕਰਤਾ ਨੇ ਦੁਕਾਨ ’ਤੇ ਜਾ ਕੇ ਦੇਖਿਆ ਤਾਂ ਦੁਕਾਨ ਵਿਚੋਂ ਕੁੱਝ ਨਵੇਂ ਮੋਬਾਇਲ ਫੋਨ , ਦੋ ਸਪੀਕਰ , ਦੋ ਪਾਵਰ ਬੈਂਕ , ਦੋ ਟੈਬਲਿਟ ਅਤੇ ਰਿਪੇਅਰ ਹੋਣ ਲਈ ਆਏ ਕੁੱਝ ਮੋਬਾਇਲ ਫੋਨ ਗਾਇਬ ਸਨ ਜਿਨ੍ਹਾਂ ਨੂੰ ਕੋਈ ਅਣਪਛਾਤਾ ਵਿਅਕਤੀ ਚੋਰੀ ਕਰ ਕੇ ਲੈ ਗਿਆ ਹੈ। ਮੁਦਈ ਵਲੋਂ ਦਿੱਤੇ ਗਏ ਬਿਆਨ ’ਤੇ ਪੁਲਿਸ ਵਲੋਂ ਮੌਕੇ ਦਾ ਜਾਇਜ਼ਾ ਲੈਣ ਉਪਰੰਤ ਅਣਪਛਾਤੇ ਚੋਰਾਂ ਦੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਗਿਆ ਹੈ।ਮਾਮਲੇ ਵਿਚ ਅਗਲੀ ਤਫਤੀਸ਼ ਏਐਸਆਈ ਸ਼ਿੰਦਰ ਪਾਲ ਵਲੋਂ ਅਮਲ ਵਿੱਚ ਲਿਆਂਦੀ ਜਾ ਰਹੀ ਹੈ।ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕਰਨਾ ਅਜੇ ਬਾਕੀ ਹੈ।