ਤੇਜ਼ ਗੇਂਦਬਾਜ਼ ਪੰਕਜ ਸਿੰਘ ਨੇ ਕ੍ਰਿਕਟ ਦੇ ਸਾਰੇ ਰੂਪਾਂ ਤੋਂ ਲਿਆ ਸੰਨਿਆਸ

ਜੈਪੁਰ : ਰਾਜਸਥਾਨ ਦੇ ਤੇਜ਼ ਗੇਂਦਬਾਜ਼ ਪੰਕਜ ਸਿੰਘ ਨੇ ਕ੍ਰਿਕਟ ਦੇ ਸਾਰੇ ਰੂਪਾਂ ਤੋਂ ਸੰਨਿਆਸ ਲੈ ਲਿਆ ਹੈ। ਰਾਜਸਥਾਨ ਦੀ 2010-11 ਤੇ 2011-12 ਵਿਚ ਲਗਾਤਾਰ ਰਣਜੀ ਦੀ ਖ਼ਿਤਾਬੀ ਜਿੱਤ ਦੇ ਸੂਤਰਧਾਰ ਰਹੇ ਪੰਕਜ ਨੇ ਭਾਰਤ ਵਲੋਂ 2 ਟੈਸਟ ਤੇ ਇਕ ਇਕ ਰੋਜ਼ਾ ਖੇਡਿਆ ਹੈ। ਉਹ ਇਸ ਤੋਂ ਇਲਾਵਾ ਆਈ. ਪੀ. ਐਲ. ਦੇ 5 ਸੈਸ਼ਨਾਂ ਵਿਚ ਖੇਡਿਆ ਤੇ 20 ਮੈਚਾਂ ਵਿਚ 11 ਵਿਕਟਾਂ ਹਾਸਲ ਕੀਤੀਆਂ।
ਪੰਕਜ ਨੇ ਇਕ ਬਿਆਨ ਵਿਚ ਕਿਹਾ, ‘‘ਇਹ ਇਕ ਆਸਾਨ ਫੈਸਲਾ ਨਹੀਂ ਸੀ ਪਰ ਹਰ ਖਿਡਾਰੀ ਦੀ ਜ਼ਿੰਦਗੀ ਵਿਚ ਅਜਿਹਾ ਸਮਾਂ ਆਉਂਦਾ ਹੈ, ਜਦੋਂ ਉਸ ਨੂੰ ਸੰਨਿਆਸ ਲੈਣਾ ਪੈਂਦਾ ਹੈ ਤੇ ਮਿਕਸਡ ਭਾਵਨਾਵਾਂ ਨਾਲ ਮੈਂ ਅਧਿਕਾਰਤ ਤੌਰ ’ਤੇ ਕ੍ਰਿਕਟ ਦੇ ਸਾਰੇ ਰੂਪਾਂ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰਦਾ ਹਾਂ। ਮੇਰੇ ਲਈ ਅੱਜ ਦਾ ਦਿਨ ਬਹੁਤ ਮੁਸ਼ਕਲ ਹੈ ਪਰ ਇਹ ਭਾਵਨਾਵਾਂ ਤੇ ਸਨਮਾਨ ਨੂੰ ਜ਼ਾਹਿਰ ਕਰਨ ਦਾ ਵੀ ਦਿਨ ਹੈ। ਆਰ. ਸੀ. ਏ., ਬੀ. ਸੀ. ਸੀ. ਆਈ., ਆਈ. ਪੀ. ਐਲ. ਤੇ ਸੀ. ਏ. ਪੀ. ਲਈ ਖੇਡਣਾ ਮੇਰੇ ਲਈ ਵੱਡਾ ਸਨਮਾਨ ਰਿਹਾ ਹੈ। ਮੈਂ 15 ਸਾਲਾਂ ਤਕ ਆਰ. ਸੀ. ਏ. ਦਾ ਹਿੱਸਾ ਰਿਹਾ ਹਾਂ ਤੇ ਮੈਂ ਕਈ ਰਿਕਾਰਡ ਹਾਸਲ ਕੀਤੇ ਹਨ ਤੇ ਆਰ. ਸੀ. ਏ. ਦੀ ਛੱਤ ਦੇ ਹੇਠਾਂ ਮੈਂ ਵੱਡਾ ਤਜਰਬਾ ਹਾਸਲ ਕੀਤਾ। ਆਰ. ਸੀ. ਏ. ਦੇ ਨਾਲ ਮੇਰਾ ਸਫ਼ਰ ਹਮੇਸ਼ਾ ਮੇਰੇ ਲਈ ਯਾਦਗਾਰ ਰਹੇਗਾ।’’