ਅਗ਼ਵਾ ਕਰ ਕੇ ਲੁੱਟੇ ਲੱਖਾਂ ਰੁਪਏ, ਕੀਤਾ ਅਣਮਨੁੱਖੀ ਤਸ਼ੱਦਦ

ਲੁਧਿਆਣਾ : ਨਾਮੀ ਗੈਂਗਸਟਰ ਸਚਿਨ ਵਲੋਂ ਹਫਤਾ ਵਸੂਲੀ ਤਹਿਤ ਸਰਕਾਰੀ ਵਕੀਲ ਦੇ ਭਰਾ ਨੂੰ ਪਹਿਲਾਂ ਗੰਨ ਪੁਆਇੰਟ ’ਤੇ ਬੱਸ ਅੱਡੇ ਦੇ ਬਾਹਰੋਂ ਅਗ਼ਵਾ ਕੀਤਾ ਗਿਆ ਅਤੇ ਕਿਲਾ ਮੁਹੱਲਾ ਸਥਿਤ ਨਿਊ ਯੰਗ ਵਾਲਮੀਕਿ ਫਾਊਂਡੇਸ਼ਨ ਨਾਂ ਦੇ ਆਪਣੇ ਦਫਤਰ ਵਿਚ ਲਿਜਾ ਕੇ ਨੰਗਾ ਕਰ ਕੇ ਕੁੱਟ-ਮਾਰ ਕੀਤੀ ਅਤੇ ਗੁਪਤ ਅੰਗ ’ਚ ਡੰਡਾ ਦੇ ਦਿੱਤਾ ਅਤੇ ਡਰਾਉਣ ਲਈ ਵੀਡੀਓ ਵੀ ਬਣਾ ਲਈ। ਏਨਾ ਹੀ ਨਹੀਂ ਫਿਰ 5.30 ਲੱਖ ਦੀ ਨਕਦੀ ਖੋਹ ਕੇ ਅੱਖਾਂ ’ਤੇ ਪੱਟੀ ਬੰਨ੍ਹ ਕੇ ਕਾਰ ਵਿਚ ਸੁੰਨਸਾਨ ਜਗ੍ਹਾ ਛੱਡ ਆਏ। ਥਾਣਾ ਡਵੀਜ਼ਨ ਨੰ. 5 ਦੀ ਪੁਲਿਸ ਨੇ ਸਚਿਨ ਅਤੇ ਉਸ ਦੇ ਸਾਥੀਆਂ ਵਿਰੁੱਧ ਮਾਮਲਾ  ਦਰਜ ਕਰ ਕੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।

ਕੀ ਹੈ ਪੂਰੀ ਘਟਨਾ ?

SHO ਰਿਚਾ ਸ਼ਰਮਾ ਮੁਤਾਬਕ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿਚ ਐੱਮ. ਐੱਫ. ਟ੍ਰੈਵਲ ਦੇ ਵਿਮਲ ਕੁਮਾਰ (46) ਨਿਵਾਸੀ ਨਿਊ ਕਰਤਾਰ ਨਗਰ, ਸਲੇਮ ਟਾਬਰੀ ਨੇ ਦੱਸਿਆ ਕਿ ਉਸ ਦੀ ਰੇਲਵੇ ਸਟੇਸ਼ਨ ਰੋਡ ’ਤੇ ਦੁਕਾਨ ਹੈ। ਉਕਤ ਮੁਜ਼ਰਮ ਉਨ੍ਹਾਂ ਤੋਂ ਨਾਜਾਇਜ਼ ਹਫਤਾ ਵਸੂਲੀ ਕਰਦੇ ਰਹਿੰਦੇ ਸਨ। ਇਸੇ ਤਹਿਤ ਬੀਤੀ 30 ਜੂਨ ਦੀ ਸਵੇਰ 7 ਵਜੇ ਉਸ ਦੇ ਦਫਤਰ ’ਚ ਸਚਿਨ, ਅਸ਼ੋਕ ਕੁਮਾਰ, ਮਾਹਨ, ਦੀਪਕ ਨਿਵਾਸੀ ਕਿਲਾ ਮੁਹੱਲਾ ਆਏ ਅਤੇ ਕਬਜ਼ਾ ਕਰਨ ਦੀ ਨੀਅਤ ਨਾਲ ਕੁਰਸੀਆਂ ਰੱਖ ਕੇ ਬੈਠ ਗਏ ਪਰ ਬਹਿਸ ਕਰਨ ਦੀ ਬਜਾਏ ਕੁੱਝ ਸਮੇਂ ਬਾਅਦ ਹੀ ਉਹ ਆਪਣੇ ਘਰ ਚਲਾ ਗਿਆ। ਲਗਭਗ 11.30 ਵਜੇ ਦੁਕਾਨ ਖਰੀਦਣ ਕਾਰਨ ਬੱਸ ਅੱਡੇ ਆਪਣੇ ਦੋਸਤ ਬਨੀ ਕੋਲ ਗਿਆ ਅਤੇ ਪਾਰਕਿੰਗ ਵਿਚ ਕਾਰ ਖੜ੍ਹੀ ਕਰ ਦਿੱਤੀ। ਕੁੱਝ ਸਮੇਂ ਬਾਅਦ ਹੀ ਉਕਤ ਮੁਜ਼ਰਮ ਉਥੇ ਪੁੱਜ ਗਏ ਅਤੇ ਗੰਨ ਪੁਆਇੰਟ ’ਤੇ ਆਪਣੀ ਕਾਰ ’ਚ ਬਿਠਾ ਕੇ ਲੈ ਗਏ ਅਤੇ ਦਫਤਰ ’ਚ ਲਿਜਾ ਕੇ ਕੁੱਟ-ਮਾਰ ਕਰ ਕੇ ਨਕਦੀ ਖੋਹੀ ਅਤੇ ਵੀਡੀਓ ਬਣਾਈ ਅਤੇ ਧਮਕਾਇਆ ਕਿ ਉਨ੍ਹਾਂ ’ਤੇ ਪਹਿਲਾਂ ਵੀ ਕਈ ਪਰਚੇ ਦਰਜ ਹਨ, ਜੇਕਰ ਪੁਲਿਸ ਨੂੰ ਸ਼ਿਕਾਇਤ ਕੀਤੀ ਤਾਂ ਪਰਿਵਾਰ ਦਾ ਨੁਕਸਾਨ ਕਰ ਦੇਣਗੇ, ਜਿਸ ਤੋਂ ਬਾਅਦ ਆਪਣੇ ਕੁੱਝ ਸਾਥੀ ਬੱਸ ਅੱਡੇ ’ਤੇ ਭੇਜ ਕੇ ਉਨ੍ਹਾਂ ਦੀ ਕਾਰ ਵੀ ਕਬਜ਼ੇ ਵਿਚ ਲੈ ਲਈ ਅਤੇ ਅੱਖਾਂ ’ਤੇ ਪੱਟੀ ਬੰਨ੍ਹ ਕੇ ਸੁੰਨਸਾਨ ਜਗ੍ਹਾ ’ਤੇ ਛੱਡ ਗਏ। ਫਿਰ ਗੈਂਗਸਟਰ ਸਚਿਨ ਨੇ ਫੋਨ ਕਰ ਕੇ ਉਸ ਨੂੰ ਧਮਕੀਆਂ ਵੀ ਦਿੱਤੀਆਂ। ਪੀੜਤ ਵੱਲੋਂ ਥਾਣਾ ਕੋਤਵਾਲੀ ਪੁਲਿਸ ਕੋਲ ਵੀ ਸ਼ਿਕਾਇਤ ਕੀਤੀ ਗਈ ਹੈ, ਜਿਸ ਦੀ ਜਾਂਚ ਵੱਖਰੇ ਤੌਰ ’ਤੇ ਕੀਤੀ ਜਾ ਰਹੀ ਹੈ। ਬਦਮਾਸ਼ਾਂ ਵੱਲੋਂ ਉਸ ਦੀ ਦੁਕਾਨ ’ਤੇ ਆਪਣੇ ਤਾਲੇ ਲਗਾ ਦਿੱਤੇ ਗਏ ਸਨ, ਜੋ ਪੁਲਿਸ ਨੇ ਖੁੱਲ੍ਹਵਾਏ ਹਨ। SHO ਕੋਤਵਾਲੀ SI ਹਰਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਸ਼ਿਕਾਇਤ ਆਈ ਹੈ, ਜਿਸ ਦੀ ਜਾਂਚ ਕੀਤੀ ਜਾ ਰਹੀ ਹੈ।