ਫ਼ਿਰੋਜ਼ਪੁਰ, (ਸੱਚੀ ਕਲਮ ਬਿਊਰੋ) : ਤਲਵੰਡੀ ਰੋਡ ਜ਼ੀਰਾ ਕੋਲ ਵਾਪਰੇ ਇਕ ਸੜਕ ਹਾਦਸੇ ਵਿਚ 42 ਸਾਲਾ ਵਿਅਕਤੀ ਦੀ ਮੌਤ ਹੋ ਜਾਣ ਦੀ ਖਬਰ ਪ੍ਰਾਪਤ ਹੋਈ ਹੈ। ਜ਼ੀਰਾ ਸਿਟੀ ਪੁਲਿਸ ਦੇ ਵਲੋਂ ਇਕ ਕਾਰ ਚਾਲਕ ਖਿਲਾਫ ਮੁਕੱਦਮਾ ਦਰਜ ਕਰ ਲਿਆ ਗਿਆ ਹੈ। ਰਾਮ ਸਰੂਪ ਪੁੱਤਰ ਗਿਆਨ ਚੰਦ ਵਾਸੀ ਮੱਲੋ ਕੇ ਰੋਡ ਜ਼ੀਰਾ ਨੇ ਬਿਆਨਾਂ ਵਿਚ ਦੋਸ਼ ਲਗਾਇਆ ਕਿ ਉਸ ਦਾ ਲੜਕਾ ਸੋਨੂੰ (42) ਆਪਣੇ ਬੁਲਟ 'ਤੇ ਸਵਾਰ ਹੋ ਕੇ ਬੀਤੀ ਦੁਪਹਿਰ ਕਿਤੇ ਜਾ ਰਿਹਾ ਸੀ ਜਦੋਂ ਸੋਨੂੰ ਬਾਈਪਾਸ ਨਹਿਰ ਪੁਲ ਤਲਵੰਡੀ ਰੋਡ ਜ਼ੀਰਾ ਕੋਲ ਪਹੁੰਚਿਆ ਤਾਂ ਇਕ ਕਾਰ ਚਾਲਕ ਨੇ ਬਿਨ੍ਹਾਂ ਹਾਰਨ ਵਜਾਏ ਤੇਜ਼ ਰਫਤਾਰ ਨਾਲ ਕਾਰ ਲਿਆ ਕੇ ਸੋਨੂੰ ਦੇ ਬੁਲਟ ਵਿਚ ਮਾਰੀ। ਹਾਦਸੇ ਵਿਚ ਸੋਨੂੰ ਗੰਭੀਰ ਰੂਪ ਵਿਚ ਜ਼ਖਮੀ ਹੋ ਗਿਆ ਅਤੇ ਇਲਾਕੇ ਦੇ ਲੋਕਾਂ ਵਲੋਂ ਉਸ ਨੂੰ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਫਰੀਦਕੋਟ ਵਿਖੇ ਦਾਖਲ ਕਰਵਾਇਆ ਗਿਆ, ਜਿਥੇ ਦੌਰਾਨੇ ਇਲਾਜ਼ ਸੋਨੂੰ ਪ੍ਰਾਣ ਤਿਆਗ ਗਿਆ। ਕਾਰ ਚਾਲਕ ਸੌਰਵ ਸਿੰਗਲਾ ਪੁੱਤਰ ਰਾਮ ਚੰਦ ਵਾਸੀ ਬਠਿੰਡਾ ਹਾਲ 28 ਢੀਂਗਰਾ ਹਸਪਤਾਲ ਅਮ੍ਰਿਤਸਰ ਵਿਰੁਧ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਆਰੰਭ ਕਰ ਦਿੱਤੀ ਗਈ ਹੈ।