ਆਸਟਰੇਲੀਆ ਦੀ ਟੀਮ ਵਿਚ ਵੀ ਭਾਰਤ ਦੀ ਤਰ੍ਹਾਂ ਡੂੰਘਾਈ ਹੋਣੀ ਜ਼ਰੂਰੀ : ਟਿਮ ਪੇਨ

ਮੈਲਬੋਰਨ : ਆਸਟਰੇਲੀਆ ਦੇ ਟੈਸਟ ਕਪਤਾਨ ਟਿਮ ਪੇਨ ਨੇ ਕਿਹਾ ਕਿ ਆਸਟਰੇਲੀਆ ਨੂੰ ਟੀਮ ਵਿਚ ਭਾਰਤ ਦੀ ਤਰ੍ਹਾਂ ਡੂੰਘਾਈ ਬਣਾਉਣੀ ਪਵੇਗੀ ਤਾਕਿ ਉਸ ਦੇ ਚੋਟੀ ਦੇ ਖਿਡਾਰੀਆਂ ਨੂੰ ਆਰਾਮ ਦੇ ਕੇ ਤਰੋਤਾਜ਼ਾ ਰਖਿਆ ਜਾ ਸਕੇ। ਭਾਰਤ ਦੇ ਚੋਟੀ ਦੇ ਕ੍ਰਿਕਟਰ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦਾ ਫ਼ਾਈਨਲ ਖੇਡਣ ਲਈ ਇੰਗਲੈਂਡ ਵਿਚ ਹਨ ਜਿਹੜੇ ਬਾਅਦ ਵਿਚ ਇੰਗਲੈਂਡ ਵਿਰੁਧ ਟੈਸਟ ਲੜੀ ਵੀ ਖੇਡਣਗੇ। ਉਥੇ ਹੀ ਭਾਰਤ ਨੇ ਸ਼੍ਰੀਲੰਕਾ ਵਿਚ ਸੀਮਤ ਓਵਰਾਂ ਦੀ ਲੜੀ ਲਈ ਇਕ ਵਖਰੀ 20 ਮੈਂਬਰੀ ਟੀਮ ਦਾ ਐਲਾਨ ਕੀਤਾ ਹੈ। ਇਸ ਵਿਚਾਲੇ ਆਸਟਰੇਲੀਆ ਦੇ ਚੋਟੀ ਦੇ ਕ੍ਰਿਕਟਰ ਵੈਸਟਇੰਡੀਜ਼ ਦੇ ਆਗਾਮੀ ਦੌਰੇ ਵਿਚੋਂ ਬਾਹਰ ਰਹਿ ਸਕਦੇ ਹਨ।
 ਪੇਨ ਦਾ ਮੰਨਣਾ ਹੈ ਕਿ ਆਸਟਰੇਲੀਆ ਨੂੰ ਅਜਿਹੇ ਨੌਜਵਾਨ ਖਿਡਾਰੀਆਂ ਦੀ ਲੋੜ ਹੈ ਜਿਹੜੇ ਕੌਮਾਂਤਰੀ ਪੱਧਰ ’ਤੇ ਚੰਗਾ ਪ੍ਰਦਰਸ਼ਨ ਕਰ ਕੇ ਸੀਨੀਅਰ ਖਿਡਾਰੀਆਂ ਦਾ ਬੋਝ ਘਟਾ ਸਕਣ। ਉਸ ਨੇ ਕਿਹਾ ਕਿ ਇਹ ਜ਼ਰੂਰੀ ਹੈ ਕਿ ਅਸੀਂ ਅਪਣੀ ਟੀਮ ਵਿਚ ਅਜਿਹੀ ਡੂੰਘਾਈ ਪੈਦਾ ਕਰੀਏ ਤਾਂ ਕਿ ਖਿਡਾਰੀਆਂ ਨੂੰ ਸਮੇਂ-ਸਮੇਂ ’ਤੇ ਆਰਾਮ ਦਿਤਾ ਜਾ ਸਕੇ। ਇਸ ਸਮੇਂ ਭਾਰਤੀ ਟੀਮ ਅਜਿਹਾ ਕਰ ਰਹੀ ਹੈ। ਉਨ੍ਹਾਂ ਕੋਲ ਟੈਸਟ ਕ੍ਰਿਕਟ ਲਈ ਪ੍ਰਤਿਭਾਵਾਂ ਦੀ ਕਮੀ ਨਹੀਂ ਹੈ ਤੇ ਸੰਤੁਲਨ ਇਕਦਮ ਸਹੀ ਹੈ। ਸਾਨੂੰ ਵੀ ਉਨ੍ਹਾਂ ਦੀ ਰੀਸ ਕਰਨੀ ਪਵੇਗੀ।